Lykilhæfni
Drög
Í hlutverkagrein laga nr. 92/2008 um framhaldsskóla segir:
Hlutverk framhaldsskóla er að stuðla að alhliða þroska allra nemenda og virkri þátttöku þeirra í lýðræðisþjóðfélagi með því að bjóða hverjum nemanda nám við hæfi.
Framhaldsskólar búa nemendur undir þátttöku í atvinnulífinu og frekara nám. Þeir skulu leitast við að efla færni nemenda í íslensku máli, bæði töluðu og rituðu, efla siðferðisvitund, ábyrgðarkennd, víðsýni, frumkvæði, sjálfstraust og umburðarlyndi nemenda, þjálfa þá í öguðum og sjálfstæðum vinnubrögðum, jafnrétti og gagnrýninni hugsun, kenna þeim að njóta menningarlegra verðmæta og hvetja til þekkingarleitar. Framhaldsskólar sinna miðlun þekkingar og þjálfun nemenda þannig að þeir öðlist færni til að gegna sérhæfðum störfum og hafi forsendur til að sækja sér frekari menntun.
Hér er rætt um mikilvægi þeirrar hæfni sem nemandinn öðlast í gegnum nám sitt almennt og með virkri þátttöku innan og utan skóla. Fullyrða má að hver og einn þurfi að búa yfir ákveðinni grunnhæfni til að viðkomandi geti lifað og unnið í sátt við sjálfan sig, hafi möguleika á að þróast í og með umhverfi sínu, og eigi möguleika á að bæta lífsskilyrði sín með því m.a. að geta tekið meðvitaðar ákvarðanir og haldið áfram námi (Eurydice, 2002). Deila má um hvort hlúð sé nægjanlega að þessum þáttum í hefðbundnu skólastarfi en í kjölfar nýrra laga er aukin áhersla lögð á þessa þætti.
Í menntamálaráðuneytinu er nú unnið að íslenskri skilgreiningu á þeim lykilhæfniþáttum sem ætlast er til að allir nemendur tileinki sér í gegnum skólakerfið.
Lágmarkshæfni þessara lykilþátta er skilgreind sem sú grunnhæfni sem skólum er ætlað að tryggja að nemendur öðlist og fellur hún á hæfniþrep eitt. Hluti þessarar grunnhæfni hefur hingað til verið gert skil í ákveðnum skylduáfanga svo sem NAT, LKN og UTN. Menntamálaráðuneyti mun ekki skilgreina ákveðna áfanga sem taka á þessum þáttum, heldur lætur skólunum eftir að skipuleggja námsbrautir þannig að þessum hæfnimarkmiðum verði náð.
