Frumvarpið sem grundvallar þessi lög var lagt fram samhliða frumvarpi til laga um leikskóla, frumvarpi til laga um grunnskóla og frumvarpi til laga um framhaldsskóla. Frumvarpið byggði á vinnu starfshóps sem menntamálaráðherra skipaði í apríl 2005, til þess að endurskoða ákvæði laga nr. 86/1998, um lögverndun á starfsheiti og starfsréttindum grunnskólakennara, framhaldsskólakennara og skólastjóra. Í megindráttum fela lögin  í sér að ríkari kröfur verða gerðar til kennaramenntunar. Stærsta breytingin felst í þeim kröfum sem gerðar verða til kennaramenntunar. Til þess að geta fengið leyfisbréf sem leikskólakennari, grunnskólakennari og framhaldsskólakennari verður sá sem þess óskar að hafa lokið meistaraprófi frá háskóla sem hlotið hefur viðurkenningu ráðherra á fræðasviði til kennslu á viðkomandi skólastigi.

• Gerðar eru sambærilegar kröfur til menntunar kennara á öllum skólastigum
• Menntunarskilyrði til að öðlast starfsheiti og starfsréttindi leik-, grunn- og framhaldsskólakennara aukin og gerð krafa um meistarapróf
• Starfsheiti og starfsréttindi leikskólakennara og stjórnenda leikskóla lögvernduð
• Gildissvið leyfisbréfa leik-, grunn- og framhaldsskólakennara er útvíkkað að aðliggjandi skólastigum þannig að leikskólakennarar geti kennt á yngri aldursstigum grunnskóla, grunnskólakennarar í leikskólum og framhaldsskólum og framhaldsskólakennarar í grunnskólum